Tuladha Pengendhaliwara Reroncen Adicara Nggunakake Basa Jawa

Assalamu’alaikum wr. wb

Sugeng Siyang

Nuwun…kawula nuwun…

Mahardikengtyas ring kamardikan nugraha miwah sih wilasanipun Gusti Ingkang Maha Agung, mugi anggung sumandha wonten ing jiwangga kita sawegung waradin sagung dumadi, raharja, niskala satuhu.

Nuwun, panjenenganipun Bapa Drs. Widodo, M.Pd. minangka Ketua Jurusan Bahasa dan Sastra Jawa ingkang dhahat kinurmatan.

Bapak saha Ibu Dosen ingkang winantu ing kamulyan, lan boten kesupen ugi sedaya mahasiswa Jurusan Bahasa dan Sastra Jawa ingkang sanget kula tresnani.

Minangka purwakaning atur Keparenga kula Niki Aryanti, cumanthaka wonten ing ngarsanipun panjenengan sedaya, inggih awit ngayahi jejibahan minangka pangendhaliwara “Dialog Interaktif Kaliyan Jurusan Warsa 2016” ing dinten menika.

Para rawuh ingkang dhahat kinurmatan, keparenga kula badhe hambabar reroncen adicara “Dialog Interaktif kaliyan Jurusan Warsa 2016” ing dinten menika :

1.           Sepisan, Pambuka

2.           Kaping kalih, atur pangandikan saking Bapa Drs. Widodo, M.Pd.

3.           Kaping tiga, Dialog Interaktif

4.           Kaping sekawan, Kesimpulan

5.           Ingkang pungkasan nuninggih, Panutup

Bapak Ibu Dosen saha para kadang sedaya ingkang winantu ing pakurmatan. Mekaten rantaman adicara “Dialog Interaktif kaliyan Jurusan Warsa 2016”  ing dinten menika.

Inggih, nanggap sasmita bilih adicara dinten menika badhe kawiwitan, saderengipun, wonten atur pangandikan  saking panjenenganipun Bapa Drs. Widodo, M.Pd. minangka ketua Jurusan Bahasa dan Sastra Jawa, sekaliyan dipunsuwun mbika adicara “Dialog Interaktif Kaliyan Jurusan Warsa 2016” menika kanthi cara simbolis. Dhumateng panjenenganipun kasumanggaaken.

#Matur sembah nuwun dhumateng panjenenganipun Bapa Drs. Widodo, M.Pd.  minangka ketua Jurusan Bahasa dan Sastra Jawa ingkang sampun paring pangadikan kaliyan mbika adicara ing dinten menika kanthi cara simbolis.

Menggah titilaksana adicara salajengipun adicara inti nun inggih : “Dialog Interaktif kaliyan Jurusan Warsa 2016”. Adicara  menika badhe dipunpandhegani dening moderator kangmas Bagus Nugroho. Sumangga, nuwun.

       Panutup

Matur nuwun, adicara  “Dialog Interaktif kaliyan Jurusan Warsa 2016”  sampun paripurna. Bilih wonten klenta-klentunipun Kula nyuwun agunging samudra pangaksami lan ugi ngaturaken panuwun dhumateng sedaya bapak Ibu Dosen saha para kadang ingkang sampun kersa  rawuh ing dinten menika.  nuwun, nuwun, Maturnuwun,

Wassalamualaikum Wr.wb, 

 dening: niki aryanti, Maret 2016