Brahara Kekancan Saklawase
Kaya
adate, saben jam 6 esuk swara motor jupiter warna abang wis ngumandhang ana ing
sangarepe omah. Wong nom-noman lanang kang asmane Tama wis ketingkring ana
sandhuwure jok motor, kekarepane meh ngajak mangkat sekola bareng, tur
boncengan bareng karo Yanti, kanca rakete dheweke. Tama lan Yanti kuwi wis
kekancan raket awit cilik tekan saiki, awit SD, SMP, lan SMA mesthi sasekolahan
bareng, tur omahe nom-noman kuwi uga cedhak, namung bedha Gang, merga kahanan
kuwi dadi nambah sansaya raketing kekancan kuwi. Polah lan watek apik orane
saben ijen-ijene uga wis padha mangertine.
Sakjene
Yanti wis gethun marang polahe Tama kuwi kang saben dina ngampiri dheweke,
snajan wong tuwane dheweke wis padha ngartine, nanging tetepan isin tur pekewuh
marang tangga teparo. Wektu kuwi Yanti esih eling tenan, sakdurunge Tama
ngampiri ing omahe, dheweke malah wis mangkat sekola ndisiti nitih sepedha,
nanging ya tetepan Tama malah nyusul, wis ana ing sandhinge nganggo motor
jupitere, polahe Tama sansaya ndadi, nyeneni lan misuh-misuhi Yanti, “bocah wedok,
bocah riwil tur ngeyelan, dikandhani nek dikon mbonceng aku wae kok wegah,”
celathune, nanging Yanti malah mesem-mesem tok, merga wis gethun tur pekewuh
marang polahe kanca rakete kuwi.
Ora
dinyana, Tama lan Yanti saiki wis kelas XII SMA, sedhela maneh meh ujian tur
padha lulus. Tama pangrasane campur aduk, ana rasa seneng merga sedhela maneh
meh lulus, trus nglanjutke pendidikane, nanging uga sedhih merga bakal pisah
karo Yanti, dheweke wis ngerti yen Yanti meh nglanjutke Pendidikan sekolane ing
luar kota. Tama kuwi nduweni rasa katresnan marang Yanti awit mbarang SMP,
dheweke krasa bungah atine yen terus-terusan ana sandhinge Yanti, nanging meh
ngungkapke rasa katresnan kuwi dheweke ora wani. Merga kuwi diampet tekan
saiki. Sakjane Yanti uga wis ngerti yen Tama nduweni rasa marang dheweke,
nanging Yanti ya angger meneng wae, ethok-ethok ora ngerti wae.
Cah
nom-noman loro kuwi ngerti yen ora suwe maneh bakal pisah, Tama lan Yanti
sansaya raket tur kerep ketemu, dolan bareng, sinau bareng. Saiki Tama lan
Yanti wis padha lulus SMA, bungahing rasane ati. Nalika wayah semana, Tama
ngajak Yanti dolan keliling kota kanggo saperlu ngrayakake kelulusan tur kanggo
acara kangen-kangenan yen sedhela maneh meh pisah. Tama lan Yanti keliling kota
boncengan nganggo motor Jupiter abange Tama. Wong leloro kuwi keliling kota
mampir menyang alun-alun kota, nonton film ing bioskop, tur sorene mampir
menyang segara saperlu nonton sang surya mingslep ing bumi.
Tama
lan Yanti bungah banget, wong leloro kuwi terus gegandhengan bareng, pengene
bebarengan terus aja misah, wektu lagi jejagongan bareng ing pinggir segara,
wong nom-noman loro kuwi lagi gegojegan bareng, telpone Yanti nywara, ana
telpon saka nomer anyar, sakwise di angkat jebul sing nelpon swarane cah wedok,
dheweke ngaku yen pacare Tama, tur Yanti dikon misah lan ngadohi Tama, merga
cah wedok kuwi cemburu yen weruh Tama lan Yanti tansah bebarengan terus.
Sakwise telpone dipateni, Yanti mung bisa nangis tur Tama dikon njelasake bab
cah wedok kang nelpon miki. Tama ngrangkul Yanti tur njelasake kabeh supaya
Yanti ora salah faham, kanthi mrebes mili Tama njelasake, jebule cah wedok kuwi
asmane Nisa, kanca SMA.e dheweke,tur tenan pacare Tama kang kurang luwih tembe
sesasi dadi pacare, merga Nisa saben dina tansah ngubungi lan pengen dadi
pacare Tama terus, Tama wektu kuwi pekewuh lan mesakke marang Nisa, banjur
wektu wayah semana dheweke karo Nisa dadi pacaran.
Sakjane
Tama kuwi ora ana rasa apa-apa marang Nisa, tur meh crita lan curhat babagan
iki marang Yanti, nanging ora sida merga pekewuh. Tama kuwi kerep curhat marang
Yanti bababan apa wae kang di alami ing uripe, nanging yen bab rasa lan
katresnan Tama blas wegah ora crita. Sakwise dijlentrehake kabeh bab hubungane
Tama lan cah wedok kuwi, Tama banjur wani lan nekadke ati kanggo ngungkapaken
yen dheweke nduweni rasa katresnan mbarang SMP marang Yanti, nanging ora wani
ngomong, dheweke uga emoh yen rasa katresnan kuwi banjur bakal misahake dheweke
karo Yanti. Krungu ngendikane Tama sing kaya mangkono Yanti namung ndlongop
banjur methungkul karo mrebes mili. Kanthi ngati-ati Tama ngrangkul Yanti tur
bebarengan mrebes mili di sekseni dening ombak ing segara kang sansaya gedhe.
Kedadean
wektu ing segara kuwi, ndadekake Yanti pekewuh marang Tama, polahe dadi obah,
lan njarak marang Tama, mergane dheweke ora kepengin terus-terusan nyakiti
pengrasan atine Nisa kang jelas-jelas wis tresna temen karo kanca rekete kuwi.
Yanti kepengen Tama uga nduweni rasa katresnan marang Nisa, tur urip kanthi
seneng lan bebarengan karo nisa. Wayah wengi kuwi Yanti dolan menyang omahe
Tama karepe meh nyuwun pangapura tur meh pamit merga esuke bakal mangkat
menyang semarang saperlu nglanjutke pendidikan ing kana.
Sakwise
tekan omahe tur wis ketemu karo Tama dheweke njelasake kabeh tujuwan mara
menyang omahe Tama, krungu yen Yanti meh lunga menyang Semarang, atine Tama kok
abot banget kanggo ngizini lungane kanca reket sing di tresnani kuwi, nanging
piye maneh kuwi kabeh kanggo mujudaken kekarepan lan cita-citane, kanthi
aboting rasa Tama banjur ngijini lungane Yanti kuwi, tur dheweke uga meh
ngabari yen seminggu maneh bakal mangkat menyang Kalimantan kanggo ngalnjutke
pendidikan TNI ing kana, tur Tama uga njanjeni snajan dheweke saiki wis pacaran
karo Nisa, nanging rasa katresnan kuwi tansah ana kanggo Yanti. Cah leloro kuwi
uga njanjeni yen ora bakal lali saben ijen, tur bakal maringi kabar yen wis
padha adohe, kanthi eluh kang sansaya mrebes mili ora liren-liren, Tama lan
Yanti banjur rangkul-rangkulan.
Kampus Konservasi,
20 Nov 2015
0 Comments