Sesorah (Tansah Gladhen)

Ngawekani Sipat/Tumindak Nakal Para Mudha

Assalamualaikum Wr. Wb.

Katentreman, kawilujengan, kabagjan peparing Gusti ingkang Maha Asih Allah SWT, mugi tansah kajiwa kasasira wonten jiwa raga kula lan panjenengan.

Para sepuh pinisepuh, para pepundhen ingkang kula bekteni.

Para rawuh kakung putri ingkang pantes kinurmatan.

Para kadang sarta kanca-kanca ingkang kula tresnani.

Puji syukur, sumangga tansah kita konjukaken ing ngarsa Gusti Ingkang  Maha Agung, inggih awit sih berkah, rahmat, taufik, saha hidayahipun, ingkang rinumentahaken dhumateng kita, saengga ing kalodhangan punika kita sedaya saged kempal manunggal wonten ing papan punika kanthi rahayu, wilujeng kalis ing rubeda nir ing sambekala. Ing kalodhangan punika, kula badhe ngaturaken sesorah kanthi irah-irahan ‘Ngawekani Sipat/Tumindak Nakal Para Mudha’.

Bapak/Ibu ingkang kinurmatan, sarta para kanca ingkang kula tresnani.

Saperlu dipunmangertosi bilih kenakalan remaja sakmenika maneka warni. Antawisipun : Ngrokok, mbolos sekolah, judi, trek-trekan utawi balapan liar, goroh kaliyan tiyang sepuh, nonton video porno, miras, narkoba, nyontek, tawuran antar sekolah, colong jupuk, kecanduan PS/game , lan sak piturutipun. Ingkang sedaya kala wau badhe ngrisak dhumateng generasi mudha.

Pramila saking menika, cara kangge ngawekani utawi nanggulangi tumindak nakal kala wau namung wonten 3(tigang) cara :

Tiyang sepuh, bebrayan lan ing sekolahan .

Sepisan: tiyang sepuh Bapak Ibu.

Tiyang sepuh mboten kenging ucul asta (lepas tangan) mboten nggatosaken pendidikan dhumateng putra-putranipun salebeting wonten griya. Mboten cekap tiyang sepuh namung masrahaken dhateng pembantu rumah tangga utawi sanesipun. Malah kapara wekdal paling dangu saged kempal kaliyan putra malah  wonten griya. Dipun awasi kados pundi kegiyatan sak dinten–dintenipun.

Kaping kalih : Masyarakat utawi bebrayan

Masyarakat kedah peduli migatosaken para rumaja wonten sak kiwa tengenipun kanthi ndamel organisasi Karang Taruna, ingkang kegiatanipun kangge kemajengan wilayahipun.

Kaping tiga : Sekolah

Jaman sakmenika sekolah dipun anggep sawijining panggenan panggulawenthah lare ingkang sae. Sekolah saenipun mboten namung minteraken lare kemawon , ananging ugi ndamel mental lan spiritualipun, lajeng dados sae ugi. Kajawi kanthi materi wajib ugi dipun tambahi materi-materi extrakurikuler, kadosta : Olah raga Volly, sepak bola, pinpong, seni musik, karawitan, tari jawa, panembrama lan sanes-sanesipun. Kamangka saged ndadekaken lare dados kreatif ugi lare mboten wonten wekdal kangge  neka-neka.

Bapak Ibu lan sedaya para rawuh ingkang kula tresnani.

Mekaten atur pramayogi kula salebeting ngawekani tumindak nakal para mudha ing jaman samangke, kiranging trapsila saha atur ingkang tumpangsuh kula nyuwun agunging samodra pangaksami. Cekap semanten nuwun, nuwun, nuwun.

Wassalamualaikum wr.wb